‘കോടതി കാര്യങ്ങളില്‍ തീരുമാനം എടുക്കേണ്ടത് തന്ത്രിയോ മുക്രിയോ മന്ത്രിയോ അല്ല’; ശബരിമല വിധി നടപ്പാക്കണമെങ്കില്‍ തന്ത്രിയുടെ അടുത്തേക്ക് പോകേണ്ട അവസ്ഥയെന്ന് ജസ്റ്റിസ് കമാല്‍ പാഷ
ശബരിമലയില്‍ എല്ലാ പ്രായത്തിലുമുളള സ്ത്രീകള്‍ക്ക് പ്രവേശിക്കാമെന്ന സുപ്രീംകോടതി വിധി നടപ്പാക്കണമെങ്കില്‍ തന്ത്രിയുടെ അടുത്തേക്ക് പോകേണ്ട അവസ്ഥയാണെന്ന് ജസ്റ്റിസ് കമാല്‍ പാഷ. ഭരണഘടന അനുസരിച്ച് തീരുമാനങ്ങള്‍ എടുക്കാനുള്ള ഉത്തരവാദിത്തവും ഇടപെടാനുള്ള അവകാശവും കോടതികള്‍ക്ക് മാത്രമാണ്. തന്ത്രിയോ മന്ത്രിയോ മുക്രിയോ അല്ല ഇത്തരം കാര്യങ്ങളില്‍ തീരുമാനം എടുക്കേണ്ടത്.
മതങ്ങളെ കുറിച്ച് പറയാന്‍ സുപ്രീം കോടതിക്ക് എന്ത് അധികാരം എന്നാണ് ചിലര്‍ ചോദിക്കുന്നത്. കോടതിയെ വികലമായി ചിത്രീകരിക്കാന്‍ ശ്രമം നടക്കുകയാണെന്നും ഇതിലൂടെ മത ധ്രുവീകരണത്തിനുള്ള ആസൂത്രിത ശ്രമമാണ് നടക്കുന്നതെന്നും കമാല്‍ പാഷ കുറ്റപ്പെടുത്തുന്നു. ശബരിമല വിഷയവുമായി ബന്ധപ്പെട്ട് നേരത്തെയും കമാല്‍പാഷ പരാമര്‍ശം നടത്തിയിരുന്നു.
യഥാര്‍ഥ അയ്യപ്പ ഭക്തയാണെങ്കില്‍ യുവതികള്‍ ശബരിമലയില്‍ കയറില്ലെന്നും പുനഃപരിശോധനാ ഹര്‍ജി നിലനില്‍ക്കില്ലെന്നുമാണ് അദ്ദേഹം പറഞ്ഞത്. പ്രശ്‌നമുണ്ടാവാതിരിക്കാന്‍ സ്ത്രീകള്‍ പോവാതിരിക്കുന്നതാണ് നല്ലത്. മുസ്ലീം യുവതി ശബരിമലയിലെത്തിയത് മത സൗഹാര്‍ദം തകര്‍ക്കാനാണ്. അത്തരക്കാര്‍ക്ക് സംരക്ഷണം കൊടുക്കേണ്ട ആവശ്യം സര്‍ക്കാരിനില്ല. വിശ്വാസികളായ സ്ത്രീകള്‍ മാത്രം ശബരിമലയില്‍ കയറിയാല്‍ മതിയെന്നും അദ്ദേഹം പറഞ്ഞിരുന്നു.
